Tanda Pengeran Ngintu Adat Asal Bansa

Tanda pengeran ngintu adat asal bansa

DAM udah ngatur kelas ngajat enggau betenun lalu diatu ngatur kelas nganyam

MIRI: Nembiak rebak baru diatu jarang bendar agi ngemeranka pengawa asal bansa diri laban ke tebal agi udah diau ba nengeri tauka diau ngejang ari apai indai ba sekula buding di menua pesisir tauka di nengeri ke mit agi.

Mayuh bendar penemu lama bansa kitai Iban udah nadai dikemeranka agi ulih nembiak baru, indu enggau lelaki.

Bala ke nembiak jarang bendar nemu nyanggit jalai, ngaga serangan duku, mingkai pemansai tauka raga enggau lanji tauka ma utai bukai.

Lalu sida ke indu ban engka mayuh endar ke nadai nemu mesai bulu mata pengawa baka betenun, ngebat tauka nganyam (bisi mega disebut orang ngayam) laban tegal mayuh bala apai indai sida empu endang sama nadai nemu pengawa nya.

Laban nangika penemu ngaga kraf sereta asil tauka produk asal bansa diri, nya alai udah bekau ke tembu ngatur kelas ngajat, kelas betenun enggau ngebat, diatu bala sida ari raban bansa Iban ke masuk dalam Sayap Indu Gerempung Dayak Miri

(DAM) keran deka ngasuh semua penemu lama enggau pesaka tuai bukai nya ditan, dibun sereta dikemansangka enggau meruan agi. DAM diatu merambu deka ngatur kelas nganyam.

Udah bekau dikerandauka dalam aum komiti besai DAM, semua kaban gerempung setuju magang deka ngatur kelas ngayam baruh komiti betuaika Agnes Nani ke mega nyadi ketuai pubisiti sereta mega berakup enggau sekiteri DAM ngatur iya, awakka terus ngatur projek nya enggau lengkas.

“Projek ngayam nya dipejalaika ba Ruai Francis Loke ba rumah gerempung nya di Jalai Merpati berengkah ari sehari kemari 7 Sept. Kelas berengkah jam pukul 1 lemai ngagai pukul 5 lemai ungkup sesi lemai sereta enggau berengkah pukul 5.30 lemai ngagai pukul 9 malam ungkup sesi malam,” sekiteri DAM Jacqueline Selaka madah.

“Kelas tu endang kena ngerembaika agi sereta ngetan lalu ngemeranka pengelandik bala Iban ke ngaga tikai, ngaga lenguai ungkup pupu raban bansa, kelebih ungkup bala nembiak ke benung mansang,” ku iya nerang.

Semua bala kaban gerempung diperansang awakka ulih sama enggau awakka semua sida bela ampit penemu enggau pelajar ngayam ka tambah mega awakka sama nemu produk ti manah dikena dalam pengawa nya.

“Tang nadai mega lebih ari ngulih tauka belajar pengelandik ngayam, nya alai manah agi enti sama sulih datai enggau sama dalam projek tu, ku Jacqueline.

Iya mega madah, bala mensia mayuh endan sama tau enggai enti sida deka nemu sereta mereti agi pasal sekeda tradisi pengelandik jari bala Iban.

Orang ke bisi ati deka masuk projek tu dipinta mayar RM30 enti ukai kaban gerempung tang kaban gerempung mina mayar RM20 aja.

Bala orang ke bisi ati tau talipaun ngiga Jacqueline (016-8908714); Nani (019-8751765); tukang wang Yak Dungkong (013-8333925) tauka Kitty Janggot ba opis DAM (085-435467).

By Borneo Post